اليوم السابع |
أكد الدكتور رضا حجازى وزير التربية والتعليم والتعليم الفنى، على أنه تم اتخاذ إجراءات جديدة وحازمة والاستعداد المبكر لامتحانات الثانوية العامة لهذا العام بعد حصر جميع المشكلات التي واجهت الامتحانات خلال الأعوام الماضية، وتفاديها هذا العام.

وشدد الوزير في هذا الإطار على التفتيش الدقيق قبل دخول اللجان واستخدام العصا الإلكترونية للكشف عن الإلكترونيات ومنع اصطحاب المراقبين الهواتف المحمولة داخل اللجان واستخدام تقنيات حديثة سيتم تطبيقها العام الحالي في مواجهة محاولات الغش الإلكتروني، مؤكدا أنه سيتم على الفور رصد أي طالب يقوم بمحاولة غش إلكتروني واتخاذ الاجراءات القانونية اللازمة حياله ومعاينة جميع لجان سير الامتحان والتأكد من صلاحيتها وأنها غير مدرجة بأعمال الصيانة.

وشددت وزير التربية والتعليم والتعليم الفنى على ضرورة التأكد من وجود كاميرات داخل اللجان الفرعية وإصلاح أي أعطال بها وتدريب أعضاء لجان الإدارة المكلفين للعمل داخل لجان سير الامتحانات على طبيعة عملهم داخل اللجان وحظر الندب المحلي تماما إلا عن طريق لجنة الإدارة و إعداد تقرير يومي بما يحدث في اللجنة من رؤساء اللجان والمراقبين الأوائل لتقييم أدائهم.
,,,,,,,,,,,,,,,
رد الاستاذ احمد حافظ
= وزير التعليم يتعهد باستخدام تقنيات حديثة في امتحانات الثانوية العامة هذا العام لمواجهة الغش، ورصد أي طالب على الفور يحاول الغش واتخاذ الإجراءات القانونية ضده.
= يا سيادة الوزير: هي المشكلة في استخدام التقنيات الحديثة؟ ولا في اتخاذ الإجراءات القانونية ضد الغشاشين؟ ولا المشكلة في إن الوزارة معندهاش حل للغش.. ولا عارفه توقفه.
= يا سيادة الوزير: حضرتك من سنة كاملة أعلنت إن امتحانات الثانوية العامة 2024 نسخة من امتحانات 2023.. يعني كل حاجة هتمشي زي ما هي بالظبط.. لا تغيير ولا تعديل.. يعني مكنش فيه مجهود يتعمل من الوزارة خلال السنة الكاملة دي غير إنها تعقد وتدرس وتحط خطة محترمة تمنع الغش طالما دي المشكلة الوحيدة تقريبا في الثانوية العامة.
= يا سيادة الوزير: أنا مشكلتي مش مشكلة طالب صوّر ونشر ورقة الأسئلة.. ده معروف إنه هيتجاب من قفاه بعد دقيقتين وهيسقط وهيطلع عينه وهيندم ندم عمره.. لكن حضرتك تقدر تقولي: هتعمل إيه في الطالب اللي بيستقبل الإجابة؟.
= يا سيادة الوزير: هتعمل إيه في الطالب اللي - لا صور ولا نشر ولا حد عارف إنه معاه موبايل أصلا- بس قاعد فاتح الموبايل ومخبيه وبيستقبل الإجابات على واتس آب أو تطبيق تليجرام وممكن يقفل حل الامتحانات في نص ساعة بإجابات نموذجية.
= يا سيادة الوزير: هتعمل إيه مع الطالبة اللي لابسة حجاب ومغطيها شعرها وزارعة سماعة صغيرة في ودانها وبتستقبل إجابة حل الامتحان بدون ما حد يحس بيها ولا يتعرف إنها حطة سماعة ولا السماعة متصلة بتليفون مستخبي في ملابسها وبتحل بإجابات نموذجية.
= يا سيادة الوزير: هتعمل إيه مع أي مراقب سايب اللجنة تخبط تقلب ويقولك أنا مش هدخل نفسي في مشاكل واللي يغش يغش.. المهم محدش يصور وينشر علشان ميحصليش مشكلة.
= يا سيادة الوزير: هتعمل إيه مع المراقب اللي يتساهل في الغش بشكل غير مباشر لأنه خايف يتعرض لأذى من الطلبة.. والكلام ده محدش ينكره وموجود في مناطق معينة.
= يا سيادة الوزير: هتعمل إيه في الغش من خلال ساعات اليد الحديثة وبعض نظارات العين وبعض الأقلام الحديثة المتصلة بكاميرات وبالإنترنت وفيها شريحة اتصال.. طب دي معظم المراقبين مش عارفين إيه اللي بيستخدم منها في الغش ولا لأ.
= علشان كده.. أي كلام عن القضاء على الغش وهم ومش عايز أقول خداع.. طالما معندكش أدوات تحارب بيها الطلبة اللي بقت بتخترع طرق غش متخطرش على بال حد.. احنا بنستسهل كل سنة تفتيش الطلبة بالعصا الإلكترونية مع إن كل اللي معاه تليفون وسماعة داخل اللجنة المفروض إنه اتفتش وهو داخل اللجنة بس يا ترى عدى ازاي من التفتيش؟!. ودي أزمة الوزارة مع الغش من سنين ولسه مكملة.
= مواجهة الغش في الثانوية العامة 2024 بنفس طريقة 2012.. قمة الاستسلام للأمر الواقع.. والكلام إن فيه خطة لرصد اللي بيصور وبينشر بتقنيات حديثة.. معناه إن الوزارة لحد دي الوقت مش عارفة فين المشكلة.. لو شايفين إن الانتصار الحقيقي هو إنك تمسك اللي صور ونشر ورقة الأسئلة.. يبقى ده قمة العجز.. لأن الانتصار الحقيقي إنك توصل للطالب اللي لا بيصور ولا يبنشر ولا حد حاسس بيه.. لكنه حل الامتحان بالسماعة في نص ساعة.
= سيادة الوزير: أنا مش ضدك ولا ضد إنك تستخدم تقنيات حديثة لمواجهة الغش.. أنا ضد توصيفك لمشكلة الغش في الثانوية العامة.. أنا لا يعنيني اللي يصور وينشر السؤال وتقدر تجيبه بالتقنيات الحديثة.. أنا يعنيني الفاشل اللي استقبل إجابة الأسئلة وأصبح من أهل القمة.
= اللهم قد بلغت اللهم فاشهد.
أ. احمد حافظ
صحفي بالاهرام