الواحد واقف مظبوط
و الاتنين بتبص عليه
و السته عكس الاتنين
و لسه بردو بيلخبط بين ٢ و ٦ و بين 6 و 9 و بين ٧ و ٨

((((مشكله الاتجاهات في الكتابه ))))
مشكلة شائعة و محبطة جدا
بعد ما بنكون بذلنا مجهود مع الطفل و هو نفسه بذل مجهود جامد في تعلم الارقام او الحروف تظهر مشكله زي دي تقلب كل الموازين
و للأسف اول حل بنلجأ ليه التوجيه المباشر (دي بتبص يمين و دي شمال) او ممكن توصل للتعنيف كمان
في البوست دي شوية خطوات عملية و حلول علمية صحيحه ان شاء الله تفيد بشدة في الموضوع ده .....
الخطوة ١
مهم ان الطفل يتعلم الاتجاهات بأشياء محسوسه قبل البدء في تعلم الرياضيات و الكتابه عامة
يعني هيتعلم فوق /تحت /جوه /بره /يمين /شمال ... ألخ
بأدوات و لعب او ألعاب حركية يقوم بيها بنفسه قبل تعلمها علي الورق
الخطوة ٢....
انشطة الاختلافات بين الصور و استخرج الشيء المختلف
مفيدة جدا في التمييز و الادراك البصري للفروق البسيطه و اللي بتساعد بشكل ملحوظ في حل المشكلة دي
الخطوة ٣....
تمارين حسية يتعلم بيها كتابه الارقام و الحروف نفسها في بداية مرحلة التدريب ع الكتابه و القراءة و دي بنستخدم فيها ....
- الحروف و الارقام المجسمة
- صندوق الكتابه علي الرمل
- كروت الصنفرة
- الكتابه علي أكياس الجل

و النقطة دي مهمه جدا لأنها مش مجرد لعب او تسليه او وسيلة مختلفه زي ما ناس كتير متخيله لأ دي بتشتغل علي الادراك العقلي مباشرة
بتشكل روابط عصبية و ذهنية في مخ الطفل للشكل الصح عن طريق حواسه
مش بصورة مجردة زي ما بيشوفها علي ورق لأول مرة من غير ما يحسها و يلمسها و نطلب منه بعد كده يكتبها و هي لسه مش ثابتة في ادراكة بصورتها الصحيحة
الخطوة ٤
شيتات الانتباه و التركيز
نطبعها او حتي نحاول ننفذ زيها بخط ادينا و نقدمها للطفل (بمستوي الصعوبة المناسب لعمره و قدراته) و مهمة جدا النقطه دي مينفعش نستعجل و نقدم نماذج معقدة تسبب احباط للطفل
حتي لو هنبدأ ب٣ اشكال فقط في الورقه و فيهم شكل اتجاهه مختلف
*** الخطوات و التمارين دي قبل و اثناء تعلم القراءة و الكتابه و الرياضيات و ممكن تبدأي بيها في أي وقت و اي سن ظهرت فيه المشكله دي مع الطفل  
نفعكم الله بها و أولادكم
مس_نوشا
معلمة_الأطفال