تنمر الاقرباء علي الاطفال بيكون من اصعب انواع التنمر اللي بنقابلها

لأن طبعا بيكون فيه حرج إنك ترفض طريقه الكلام، علشان بنعمل حساب لزعل العائلات من بعضها

والمشكله ان المتنمر، مش بيعرف إنك محرج وخايف علي مشاعره، فبيزيد في طريقته

واللي بيدفع التمن الطفل، لانه بيتجرح، وبيحس كمان بالتخلي، وإن اهله اشتروا خاطر كل الناس إلا هو

وكمان فيه اطفال بتفهم، إن طالما بابا وماما ساكتين، يبقي المتنمر عنده حق في كلامه، أو إنه مش مسموح ليه يعبر عن وجعه طالما الوجع جاي من شخص قريب

التنمر مؤذي في كل الأحوال، سواء من القريبين أو من ناس بعيده

ومفيش اي مبرر لاي شخص يأذي مشاعر طفل ويجرحه بكلمة، ويستغل ضعفه وعدم قدرته علي الرد

كلمات زي
يا تخين، يا معصص، يا الدغ، يا قزعه، شعرك خشن.... الخ
حتي لو اتقالت بهزار فهي بتوجع الطفل والمراهق جدا جدا

اقفوا جنب اولادكم
دافعو عنهم، علشان ميبقاش الجرح مضاعف
علم ابنك برضه هو كمان يرفض بكل اداب واحترام وصوت حازم

واللي يزعل وانت بتحافظ علي مشاعر ابنك، يبقي المشكلة عنده هو

التنمر ممكن يجيب اكتئاب وقله ثقه بالنفس، وبيعلم الاطفال تبقي متنمره
وفيه اطفال انتحرت بسبب التنمر

يعني الموضوع مش سهل ولا عادي

معا لصحة افضل لأطفالنا