= لو المدارس اتعاملت في الغياب رسمي، زي الوزارة ما بتقول، وتحديدا في الثانوية العامة، فالطالب اللي هيتجاوز نسبة الغياب هيتحول منازل.. طب ولو اتحول منازل؟ هيكون ملزم يرجع التابلت للمدرسة بنفس حالته اللي استلمه بيها.. يعني لا مكسور ولا مخدوش ولا شاشته فيها حاجة، ولا عطلان، ولا بطاريته بايظة، ولا من غير شاحن، والطالب هيصلحه على حسابه قبل ما يسلمه.
= الطالب اللي هيتحول منازل، هيمتحن ورقي (بتكلم عن أولى وتانية ثانوي)، بس السنة الجاية من حقه يرجع طالب نظامي مرة تانية، ويستلم التابلت عادي كطالب منتظم.
= ادخل كل فترة بص على غيابك، شوف اتفصلت ولا اتسجل لك كام يوم غياب، وده بيكون من على موقع الوزارة، علشان ممكن تتفاجئ إنك خلاص على وشك الفصل.. ولو بتغيب بانتظام، يعني يوميا.. أنصحك بلاش، لأن لو فيه مدرسة مش ملتزمة في تسجيل الغياب ممكن تكون مدرستك ملتزمة بالتسجيل علشان تنفذ تعليمات الوزارة.
= امتحانات نص السنة للصفين الأول والثاني الثانوي، تقريبا يعني، نسخة طبق الأصل من امتحانات الشهر بتاعت أكتوبر وبتاعت نوفمبر.. بس هتكون إلكترونية.
= امتحانات أولى ثانوي وتانية ثانوي، هتكون على مستوى الإدارة التعليمية، مش على مستوى المحافظة ولا على مستوى الجمهورية، وكلها إلكتروني على منصة المدرسة بتاعتك.
= امتحانات الصف الثالث الثانوي.. ورقية بالكامل.. 85% أسئلة اختيار من متعدد.. 15% مقالي.. والسؤال المقالي إجابته في سطرين تلاتة مش ورقة كاملة ولا حاجة.
= الامتحانات أوبن بوك.. بس مش من كتاب.. كل طالب هيتسلم مجلد مفاهيم مطبوع فيه ملخص للمادة والمفاهيم اللي انت هتحتاجها في الامتحان.. وفي نهاية وقت الامتحان الطالب هيسلم المجلد ويرجع يستلمه تاني المادة اللي بعدها.
= الوزارة هتعمل امتحانات تجريبية للصف الثالث الثانوي على شكل وطبيعة أسئلة امتحانات آخر السنة.. ودي هتكون بداية الترم التاني (يعني على شهر مارس).. وهتكون نسخة من امتحانات آخر السنة.. وأسئلة آخر السنة.. السؤال هيتحط بحيث يكون له إجابة واحدة فقط.
احمد حافظ
صحفي بالاهرام
