مهم جدا لطلاب الثانوية العامة.. متصدقش وكمّل للآخر علشان تفهم وتعرف الحقيقة 
= فيه بوست منتشر جدا على فيسبوك وتوتير مكتوب فيه بالنص "أي حد ثانوية عامة يركز في الكلام، وياريت اللي يقدر يعمل شير أو منشن لأي حد ثانوية عامة يعمل.. وقت الامتحانات بينزل أربع نماذج في اللجنة والفرق في ترتيب الأسئلة.. بيكون معاهم ورقة البابل شيت، من أول يوم امتحانات لو خدت نموذج "أ" مثلًا يبقى تاخده كل يوم في كل مادة حتى لو المراقب قالك مفيش حاجة وعادي تاخد غيره متسمعش الكلام، مهما حصل متسمعش كلامه، أغلب المراقبين مش فاهمين وشايفين الوضع عادي، لكن من أول يوم إسمك بيتسجل في الكنترول برقم أول نموذج خدته وكل النماذج وكل الإمتحانات بتتعلم على حسب أول نموذج".
= وللأسف كل كلمة في البوست ده "ملهاش أي أساس من الصحة".. والصح إنه عادي جدا في أول يوم الامتحانات تستلم نموذج أسئلة رقم (أ) والمادة اللي بعدها تستلم نموذج رقم (ب) واللي بعدها تستلم نموذج رقم (ج) واللي بعدها نموذج رقم (د).
= المهم والأهم فقط: تنقل رقم نموذج الأسئلة في ورقة الإجابة.. هيكون في ورقة البابل شيت خانة مكتوب فيها اكتب رقم النموذج.. هنا هتظلل بالقلم الجاف رقم نموذج الأسئلة في ورقة البابل شيت سواء (أ ، ب ، ج ، د ). لكن اختلاف النموذج في كل مادة عادي جدا جدا وأي كلام عكس كدة سيبكم منه.
= وللتذكرة: كل لجنة في امتحانات الثانوية العامة هيكون فيها ٤ نماذج أسئلة.. لكن الاختلاف الوحيد بينهم هو ترتيب الأسئلة.. يعني السؤال الأول في النموذج رقم (أ) هو نفسه رقم ١٠ في النموذج (ب) وهو نفسه رقم ١٨ في النموذج (ج) هو نفسه رقم ٦ في النموذج (د).. وهكذا في باقي المواد.. ولكن إنك تستلم نفس النموذج في جميع المواد غير صحيح جملة وتفصيلا.

وكان قد وجهت وزارة التربية والتعليم والتعليم الفنى رسالة مهمة لطلاب الثانوية العامة بشأن الامتحانات المقرر انطلاقها 10 يونيو المقبل.

ونشر شادى زلطة المتحدث الرسمي باسم وزارة التربية والتعليم والتعليم الفنى عبر صفحته الرسمية بفيس بوك:د، قائلا:

• - امتحانات نهاية العام الدراسي مقسمة لأربعة نماذج "أ" و"ب" و"ج" و"د" تضم نفس الأسئلة ولكن بترتيب مختلف فقط في كل نموذج
  
• - حصول الطالب على نموذج أسئلة مختلف في كل امتحان أمر طبيعي ولا يوجد به أي مشكلة إطلاقا لأن الاختلاف في ترتيب الأسئلة فقط
  
• - من ضروري أن يكتب الطالب رقم النموذج الذي حصل عليه في بياناته أعلى كراسة الإجابة
  
• - غير صحيح تماما ضرورة حصول الطالب على نفس رقم النموذج في كل الامتحانات ويمكن أن يحصل على نموذج مختلف في كل امتحان
  
• - قريبا ستقوم الوزارة بنشر فيديو توضيحي كامل لكافة التفاصيل عن طريقة كتابة البيانات وطريقة الإجابة في البابل شيت وكراسة إجابة الأسئلة المقالية.