= متصدقش اللي يقولك لازم تستلم نفس رقم نموذج الأسئلة كل يوم.. عادي جدا كل يوم تستلم نموذج مختلف.. يوم هتستلم نموذج (أ)، ويوم (ب)، ويوم (ج) ويوم (د).. المهم تظلل رقم النموذج في ورقة الإجابة.. وشكرا.. وده وزارة التعليم نفسها حسمته من زمان.
= متصدقش اللي يقولك لازم تستلم نفس لون بوكليت الأسئلة في كل الامتحانات.. لا يا عزيزي: لون البوكليت عادي يختلف في كل الامتحانات، ملكش دعوة بلون البوكليت.. وأي كلام غير كده متصدقوش.. وده وزير التعليم بنفسه اتكلم فيه.
= متصدقش اللي يقولك لازم تجاوب بالقلم الرصاص.. لا يا عزيزي: متجاوبش بالرصاص، ولا تسلم ورقة الإجابة وفيها سؤال واحد مجاوب عليه بالرصاص.. القلم الجاف، ثم الجاف ثم الجاف.. ودي وزارة التعليم أكدت عليها.
= متصدقش اللي يقولك لازم تجاوب في البوكليت وتجاوب في البابل شيت علشان ممكن الوزارة تختار الإجابة الصح بينهم.. لا يا عزيزي: الوزارة مش هتبص نهائيا لإجابتك في ورقة الأسئلة، ولو المراقب طلب منك تظلل في البوكليت قوله هات لي رئيس اللجنة لأن الوزير قال ممنوع.. اعرف حقك ومتصدقش غير كده.
= متصدقش اللي يقولك: إياك تعمل علامة (إكس) على الإجابة الغلط في البابل شيت.. لا يا عزيزي: من حقك لما تظلل دايرة وتشوف إن إجابتك غلط، إنك تعمل عليها إكس وتظلل دايرة تانية، ولو اكتشفت إن الدايرة التانية هي كمان غلط، إعمل عليها إكس هي كمان وظلل دايرة تالتة.. المهم تظلل يكون فيها إجابة للسؤال.. يعني لو عملت 3 إكس على 3 دواير والدايرة الرابعة فقط اللي مش عليها إكس.. التصحيح هيصحح لك السؤال.. وده ظهر في امتحانات السنين اللي فاتت.
= متصدقش اللي يقولك: لو عملت إكس هتاخد صفر علشان الجهاز الإلكتروني هيفتكر إنك مختار إجابتين.. والله ما هيحصل.. والإجابات اللي زي دي بتتصحح يدوي.. يعني بالعين المجردة.. يعني ليها طبيعة خاصة في التصحيح.. ودي وزارة التعليم أكدت عليها مرارا.
= طب لو ظللت دايرة وبعدين عملت عليها إكس ورحت ظللت دايرة تانية.. واكتشفت بعد كدة إن الدايرة اللي انت عملت عليها إكس هي الصحيحية.. تعمل إيه؟.. تروح يا سيدي عامل إكس على الدايرة التانية وترجع للدايرة الأولى تعمل عليها علامة صح.. وبكدة انت لغيت الإكس.. وزي ما قلت لك ورقتك دي هتتصحح يدوي يعني بالعين المجردة.. يعني حقك محفوظ.
= متصدقش اللي يقولك إنك لو ظللت رقم الجلوس غلط هتسقط في المادة.. يا عزيزي ورقتك دي بتتراجع أربع مرات كاملين من أولها لآخرها قبل ما تدخل على التصحيح.. وكل حاجة بتتراجع.. وأي بيانات مكتوبة في ورقة الأسئلة بتتراجع مع ورقة الإجابة بتاعتك.. متقلقش.. ومتصدقش غير كده.
= نقطة مهمة: لما هتيجي تتظلم على النتيجة الوزارة هتسلمك في إيدك صورة من بوكليت الأسئلة + صورة من ورقة إجابتك في البابل شيت + صورة من ورقة إجابتك للأسئلة المقالية + صورة من نموذج الإجابة اللي الوزارة صححت منه وانت هتقعد تصحح لنفسك وتدي لنفسك درجة الامتحان، ولو ليك حاجة هتاخدها.. متقلقش حقك محفوظ مهما حصل لأن كله على المكشوف
= ركّز.. اجتهد.. متسمعش.. ربنا هيجبر خاطرك
احمد حافظ
صحفي بالأهرام
