وزير التعليم يحسم كل ما يخص امتحانات الثانوية العامة بعدد الأسئلة والدرجات لكل مادة
= عايز تاخد ورقة الإجابة بدري قبل الساعة ٩ وتكتب بياناتك وتسجل رقم الجلوس وتراجع بياناتك قبل الامتحان.. يبقى تروح اللجنة بدري وتتفتش بدري وتدخل لجنتك بدري.
= جميع لجان الثانوية العامة مزودة بكاميرات مراقبة. والكاميرات متصلة بغرفة عمليات.. ونقدر نشوف أي حركة داخل اللجنة.. هنجيبك يعني هنجيبك لو عملت حاجة غلط.
= الطالب وهو داخل من باب المدرسة هيتفتش حتى لو وصل متأخر ومش هيدخل غير لما يتفتش.. لكن بعد بدء الامتحان هندخل اللجنة ونمرر العصا الإلكترونية على الطلبة وهم بيمتحنوا بشكل هادئ.. لو الجهاز عمل صوت يبقى معاك أداة غش وستتمسك ويتعمل لك محضر وهتسقط.. ده مش تفتيش.. ده مرور عادي وانت بتحل الامتحان وطالما مش معاك حاجة يبقى تخاف ليه؟
= تسريب امتحانات الثانوية العامة مستحيل قبل الساعة ٩ الصبح وأي ورقة تظهر قبل الساعة ٩ تجاهلها واتعامل إنها مزيفة ١٠٠٪؜.. لكن اللي هيصوّر وينشر أسئلة هنجيبه بعد خمس دقايق وهنعرف مكانه فين بالظبط. وهيسقط سنتين ورا بعض.
= اختلاف لون بوكليت الأسئلة بتاع الثانوية العامة عادي.. وعادي جدا كل يوم تاخد لون بوكليت شكل علشان محدش يقول هو اللون بيختلف ليه ولا انا واحد بوكليت غلط.
= ٧٠٪؜ من الأسئلة بدون صعوبة لكن ٣٠٪؜ هتيجي لأصحاب مستويات التفكير العليا (صعبة شوية).
= أي إجابة في ورقة الأسئلة مش هنصححها ولا الطالب هياخد عليها درجة واحدة.. بيني وبين الطالب ورقة الاجابة فقط (البابل شيت).
= الإجابة والتظليل بالقلم الجاف فقط مش الرصاص.
= أي ورقة فيها علامة (إكس) على إجابة سؤال معين بنصححها بطريقة مختلفة.. وكل اللي بيتقال إن علامة الإكس بتلغي الدرجة غير صحيح تماما. ولو شاكك في درجتك تعالى تظلم وضحك ورقتك لنفسك علشان تتأكد أن صححت لك الإكس ولا لأ.
= من حق طالب اللغات في الثانوية العامة، يجاوب على الأسئلة المقالية باللغة العربية أو الإنجليزية، اللي يريحه.
= الفرق الوحيد بين بابل شيت طالب المدرسة العربي وبابل شيت طالب المدرسة اللغات، إن ترتيب الإجابة لطالب المدرسة العربي (أ- ب- ج-د) وطالب المدرسة اللغات هيلاقيها a-b-c-d.
= قللنا عدد أسئلة مادة الإحصاء إلى ١٧ سؤال فقط عليهم ٢٥ درجة.. لكن جميع أسئلة المواد غير المضافة للمجموع اختيار من متعدد وكل سؤال درجة واحدة فقط.
= تصحيح الأسئلة المقالية هيكون من خلال اتنين مصححين لكل سؤال.. لو الاتنين قالوا الطالب يستحق على السؤال الدرجة كذا يبقى دي درجة الطالب في السؤال.. لكن لو اختلفوا في تقدير إجابة الطالب بما يزيد على نص درجة (يعني واحد قال درجة وواحد قال نص درجة).. هنستعين بمصحح تالت يصحح لنفس السؤال علشان الطالب ياخد حقه، وهياخد الدرجة الأعلى.
= كتيبات المفاهيم بتاعت السنة اللي فاتت هي هي اللي هتتوزع على الطلبة السنادي في اللجان.. ودي موجودة على موقع الوزارة ادخلوا شوفوها علشان تتعودوا عليها.
= المواد غير المضافة للمجموع ملهاش كتيبات مفاهيم ماعدا مادة الإحصاء هيكون فيها قوانين ونظريات موجودة في نفس بوكليت الأسئلة بتاع الامتحان.
= أي بيانات الطالب بيكتبها بنراجعها مرة واتنين وتلاتة قبل وبعد التصحيح.
= متحاولش تغش من اللي قدامك أو اللي وراك علشان ترتيب الأسئلة مختلف. وخذ بالك انت كل حركة بتعملها في اللجنة متشافة بالكاميرات.. ركز في ورقتك وبس.
= ده ملخص ما قاله الوزير اليوم عن الثانوية العامة 
= مرفق صورتين فيهم عدد الأسئلة لكل مادة بالدرجات
+
رابطين مهمين جدا جدا لطلاب الثانوية العامة:
الرابط الأول يخص كتيبات المفاهيم اللي هتتوزع على الطلبة في اللجان كل يوم امتحان وفيها ملخص لكل مادة مهم تشوفوها 
https://moe.gov.eg/ar/openbook-books/
الرابط التاني نسخة من جميع امتحانات الثانوية العامة السنة اللي فاتت (٢٠٢٣) مهم تدربوا عليها وتشوفوا طريقتها كويس علشان هيجي زيها بالظبط السنادي 
https://moe.gov.eg/ar/exam-model2022-2023/
ربنا معاكم يا أبطال 
احمد حافظ
صحفي بالاهرام