#ثانوية_عامة  
المجموع اللي ابنك يجيبه السنادي، احمد ربنا عليه، واشكر ابنك عليه.. متبصش لابن جارك ولا ابن صديقك جاب كام.. لا انت عارف غيره جاب المجموع ده ازاي، ولا بأنهي طريقة.. ابنك اللي لا كان معاه سماعة ولا تليفون ولا له في الكلام ده ولا عرف يعمل زي غيره، ورافض يكون زي غيره.. لازم يكون في نظرك بطل مهما كانت درجاته.
ابنك اجتهد في ظروف محدش يتحملها وكافح وسط ضغوط محدش غيره يحس بيها وعافر علشان يحصد تعبه في أجواء لا انت ولا غيرك يقدر عليها.. صحيح انت تعبت ودفعت وسهرت وقطعت من قوتك علشان توفر له كل حاجة.. لكنه شاف وسمع وعاش حاجات كفيلة تهد أي بني آدم وتقضي على معنوياته وتجيب نفسيته الأرض.. ورغم كل ده بيرجع بعد كل امتحان يكمل ويعافر ويتحدى كل ده علشان يشوف نفسه في نظرك بطل ويستحق.
ربنا خلقنا مختلفين في المستويات الفكرية والذهنية.. خلق ابنك متوسط وابن جارك أو قريبك بمستوى أعلى.. ربنا له حكمة إنه يخلي زميل ابنك فاكر نفسه وحش وبينجح في الغش ويعدي ويخرج يتريق ويقول أنا قفلت الامتحان بأقل جهد علشان لما يقع تبقى وقعته عبرة.. هيجيله وقت ويقع.. في الكلية هيقع في الوظيفة هيقع.. ابنك بس اللي هيكمل.. ولينا في طلاب الثانوية اللي دخلوا كليات الطب، وسقطوا بفضيحة.. ألف عبرة.. أنا لا بدافع عن منظومة ولا بهوّن عليك ولا بكتب لك مبررات.
أنا مش طالب منك غير إنك تلتمس مليون عذر لابنك.. وبقربك من الواقع علشان متظلموش ولا تيجي عليه.. وطالما تعب واجتهد وكافح وعافر، صدقني هيكمل وهتحصد تعبك فيه ولو بعد حين.. ربنا عادل ومنصف مهما كانت الظروف ظالمة.. واللي عنده هدف هيحققه، لكن عمره ما هيوصله بالغش.. فبلاش تفقد أملك في بطلك، وخليك في ضهره لأنه هيفضل يستقوى بيك.. ولو كانت كل الظروف عليه، خليك انت طول الوقت حافز ليه.
ابنك بطل لأنه عافر.. وبطل لأنه لسه واقف على رجيله.. وبطل لأنه شاف وسمع وعاش حاجات تهد ورغم كده كمّل.
ابنك بطل لأنه ابنك
احمد حافظ
صحفي بالاهرام