إلى وزير التعليم الذي قرر أن يُغادر مكتبه بحثا عن مشاكل التعليم:
= وزير التعليم قرر إنه مش هيعقد في مكتبه خالص وناوي يلف كل محافظات مصر علشان يعرف مشاكل التعليم.. وقال إنه لما يلف ويشوف المشاكل على الأرض هيقدر يحط حلول.. ووعد إنه قبل الدراسة (بعد شهرين يعني)، هتكون مشاكل التعليم اتحلت.. والأولوية للكثافة الطلابية وأزمة المعلمين ورد الاعتبار للمعلمين ومشكلة المناهج والدروس الخصوصية.
ومع التقدير الكامل لجولات وزير التعليم اللي بيعرف منها المشكلات علشان يحط الحلول.. دي قايمة بمشاكل التعليم وبعض حلولها:
= مشكلة الكثافة.. دي مش محتاجة من سيادتك جولات علشان تعرف أسبابها.. الحكاية وما فيها إنك تبني فصول جديدة.. وعلى الأقل يتم ترميم المدارس اللي مقفولة علشان الصيانة وتعيد فتحها في أسرع وقت.. وحتى لو فيه كثافة والموضوع مطوّل معانا شوية علشان ظروف البلد.. وفر مدرسين للطلبة في المدارس.. كفاية عليك تعمل حصر عددي بأرقام موثقة من كل مدرسة وإدارة ومديرية انتوا عايزين كام فصل وروح اقعد مع مجلس النواب ورئيس الوزراء قولهم أدي المشكلة وأدي الحل وحط الموضوع على الترابيزة علشان الأزمة معروفة للكل.
= مشكلة المعلمين اللي سيادتك بتبحث عنها على الأرض.. جُهد مشكور إنك تقعد مع معلمين وتعرف مطالبهم واحتياجاتهم.. بس هي معروفة يافندم.. حضرتك عندك عجز 400 ألف معلم.. بكل بساطة عايز تحل؟. يبقى يتعين 30 ألف معلم سنويا زي الريس ما قال مش إجراءات التعيين تاخد سنتين.. ومعاهم عقود لـ100 ألف معلم متخصص بالحصة واديهم مقابل مادي محترم مش تكون الحصة بـ20 جنيه زي ما بيحصل دي الوقت بشكل عشوائي.. ومعاهم المعلمين اللي خارجين على المعاش ويتجدد لهم بعد مجلس النواب ما وافق على كده بس القانون معطّل.. هتلاقي نفسك داخل في سكة 200 ألف معلم تقدر تحل بيهم جزء كبير من المشكلة.
= مشكلة رد الاعتبار للمعلمين؟. طبعا ملف مهم.. لكن الأهم: إن الوزارة نفسها ترد الاعتبار للمعلمين وتعامل كأهم عنصر في المنظومة.. ترد الاعتبار للمعلمين لما تقنع وزير المالية يحرك أساسي مرتباتهم اللي متجمد من 2014 رغم إن بيتاخد منهم ضرائب على 2024.. ترد اعتبار المعلمين لما حقوقهم المالية اللي أقرتها الدولة كحافز تطوير تعليم يتصرف كل شهر مش يتصرف كل 4 شهور مرة بسبب التلاعب في الإدارات والمديريات.. ترد الاعتبار للمعلمين لما الوزارة تبدأ تفعل صندوق رعاية المعلمين اللي فيه أكتر من مليار جنيه ومدش صرف منه مليم رغم إن الريس اللي عامله.. يترد الاعتبار للمعلمين لما يبطلوا يشتكوا من ظروفهم المادية.
= مشكلة رد الهيبة للمعلمين؟.. مش محتاجة من سيادتك جولات.. ولا إنك تسمع شكوتهم.. لأن اعتبارهم هيترد لما يكون معاهم حصانة ضد أي إهانة أو تجريح ويكون فيه معاملة خاصة ليهم في كل حاجة.. في أي خدمة.. لما تتحط عقوبات صارمة ضد أي طالب أو ولي أمر يتعدى على معلم ويكون عبرة لغيره.. لما المعلم يلاقي نفسه فعلا فعلا بيتعامل من الحكومة معاملة تليق بيه كرجل علم، وهو اللي بيعلم الوزير والقاضي والظابط والمهندس والدكتور وهو اللي بيحط البلد على الطريق الصح.. هل حضرتك تقدر تعمل ده؟. آه تقدر.. المهم الإرادة والتنفيذ مش الجولة.
= مشكلة المناهج؟. مش محتاجة من حضرتك تلف على المدارس علشان تسمع وتعرف وتشوف الحل.. القصة وما فيها إن عندك مناهج محتاجة 300 يوم دراسة وانت عدد أيام الدراسة في السنة كلها ما تجيش 200 يوم.. فالعقل والمنطق بيقولوا.. يا تخلي المناهج على مقاس الأيام الفعلية.. يا تطول العام الدراسي تخليه مناسب للمناهج بتاعتك.. وبما إن الحل الأخير غير قابل للتنفيذ.. يبقى سيادتك تعيد النظر في المناهج لأن ولي الأمر والطالب والمعلم التلاتة بيجروا ورا المناهج ومش عارفين يخلصوها.. يعني المشكلة واضحة والحل بسيط.. المهم التنفيذ.
= مشكلة الإتاحة في المدارس للصفوف الأولى؟. طبعا موضوع مهم.. بس ده محتاج حلول خارج الصندوق.. لكنه ملف خطير.. وأنا هبسطها لسيادتك.. من سنة ونص أو سنتين كده اتعمل اختبار قومي لطلاب رابعة وخامسة في القراءة والحساب.. عارف سيادتك كام طالب سقط ومكنش بيعرف يقرا ويكتب؟. أكتر من نص الطلبة اللي شملهم الاختبار؟. طب واللي نجح نجح ليه؟. لأنه دخل مدرسة من كي جي 1 (من رياض الأطفال).. مقابل اللي دخل المدرسة من أولى ابتدائي كان مستواه ضعيف.. ولقوا إن نفس نسبة دخول كي جي 1 هي نفس نسبة النجاح في القراءة والكتابة.. ده معناه إيه؟. معناه إنك بدون ما يكون كل أو أغلب الأطفال عندك ليهم مكان في رياض الأطفال (حكومي أو تجريبي) هتبقى نسبة الاستفادة من تطوير المناهج وتطوير المنظومة قليلة.. وهنفضل نلف حولين بعضينا علشان نعرف المشكلة فين ونصلحها.. مع إن ده ملخص المشكلة والحل.
= مشكلة الامتحانات؟. معروفة وواضحة ومحتاجة بس إرادة للحل.. عندك بنك أسئلة (مخزن أسئلة يعني)، تجيب أحسن معلمين في مصر في كل التخصصات لكل الصفوف وتملى بنك الأسئلة ده أسئلة.. هنا الأسئلة البسيطة وهنا الأسئلة المتوسطة وهنا أسئلة التفكير.. وبعدها تراجع على الأسئلة دي بلجان تانية غير اللجان اللي حطت الأسئلة علشان تتأكد من سلامتها.. ووقت الامتحانات تسحب من المخزن ده امتحانات كل إدارة أو مديرية أو جمهورية.. وطباعة وتوزيع الامتحانات تكون مؤمنة من جهات مختصة مش في إيد موظفين.. وتتعاملوا مع امتحانات كل صف بنفس القدر من الاهتمام.. وقتها لا هيكون عندك أسئلة غلط ولا امتحانات بتتسرب ولا أسئلة إدارة سهلة وأسئلة إدارة تانية تعجيزية.. ولا هيكون عندك أخطاء كارثية.. والأهم: مراجعة وتقييم كل المسئولين عن المركز القومي للامتحانات والاستعانة بشخصيات أمينة محترمة مكان اللي مش قد المسئولية.
= مشكلة امتحانات الثانوية؟. سيادتك ببساطة.. إلغي نظام أسئلة الاختيار من متعدد ورجع البوكليت بأسئلة مقالية لأن البابل شيت أثبت إنه أسهل وسيلة للغش.. ورجع المعلمين يصححوا الامتحانات بنموذج إجابة واضح ومحدد.. ووفر تكلفة التصحيح الإلكتروني المبالغ فيها واشتري مكانها أجهزة تشويش محدودة النطاق (داخل المدرسة فقط) علشان متأثرش على البيئة السكانية المحيطة طالما قطع الإنترنت في البلد مستحيل.
= مشكلة الدروس الخصوصية اللي سيادتك اتكلمت عنها؟. هي مش هتتلغي.. انت تقدر تقلل منها.. بس الأهم ازاي؟. ازاي دي بقى لما ترد الاعتبار للمعلم وتخليه حابب وظيفته كمعلم في المدرسة.. ولما الطالب يلاقي مدرسين فعلا جوه المدرسة مش مفيش معلمين علشان العجز ولا فيه معلمين بيسيبوا المدرسة علشان يروحوا السنتر.. ولما الطالب يلاقي المدرسة ليها فايدة فعلا مش مجرد تضييع وقت.. ولما تخلي المناهج على قد عدد الأيام لأن السنتر هيكون بديل للطالب اللي مش ملاحق على المنهج اللي مدرس المدرسة نفسه مش ملاحق عليه فهيكون مضطر ياخد دروس.. من الآخر: لما تعمل يوم دراسي بمعنى الكلمة.
= أدي المشكلات وأدي جزء من حلولها.. ببساطة تقدر تجيب معلمين ومديرين مدارس وإدارات ومتخصصين.. وتتشكل مجموعات لدراسة كل مشكلة مع المسؤولين المختصين.. تتحط حلول وقتية وحلول مستقبلية وحلول مستدامة.. واللي تقدر تعمله عندك بخطة عمل قابلة للتنفيذ اعمله.. متقدرش عليه وفوق قدراتك.. ارفعه للبرلمان والحكومة وقولهم أدي المشكلة وأدي الحل.. الموضوع أكبر من وزير ووزارة.. الموضوع محتاج دولة.
= مشاكل المنظومة التعليمية مش محتاجة نضيع فيها وقت تاني علشان نشوفها على الأرض.. مشاكل التعليم مش محتاجة من حضرتك كوزير جديد تستنزف جهدك وطاقتك ووقتك وجهد وطاقة ووقت كل المسئولين اللي معاك في الوزارة.. أدي يافندم ملخص مشاكل التعليم إذا أردت الحل.
احمد حافظ
صحفي بالاهرام
