درجات الرأفة في الثانوية العامة.. وهل من حق طالب يرفض ياخد درجات رأفة ؟
كل ما يخص درجات الرأفة في الثانوية العامة:
= درجات الرأفة دي بتكون وقت المراجعة النهائية يعني قبل تجميع النتيجة النهائية للثانوية العامة.
= درجات الرأفة بتكون خاصة بالطالب الراسب في مادة أو اتنين أو تلاتة.
= درجات الرأفة ممكن توصل إلى ١٠٪؜ من درجات المادة علشان تساعد بعض الطلبة إنهم ينجحوا.
= درجة الرأفة بتكون لطالب (مثلا) ناجح في كل المواد وراسب في مادة وواقف على درجتين تلاتة أربعة خمسة وينجح ممكن ياخدهم وينجح في المادة دي بحيث يتحول من راسب في مادة لناجح في كل المواد.
= درجة الرأفة بتكون لطالب (مثلا) راسب في ٣ مواد وبكدة لازم يعيد السنة لأنه مينفعش يدخل الدور التاني إلا في مادتين فقط.. فالوزارة بتشوف أنهي مادة من المواد التلاتة محتاج فيها درجتين تلاتة أربعة فياخدهم وينجح في المادة دي بحيث يتحول من طالب لازم يعيد السنة لطالب يدخل دور تاني في مادتين.
= درجة الرأفة بتكون لطالب راسب في مادتين، وفيه مادة منهم محتاج فيها درجتين تلاتة أربعة وينجح فيها، فبياخدهم وينجح فيها ويدخل دور تاني في مادة واحدة.
= درجة الرأفة مش بياخدها طالب ناجح علشان يقفل درجات مادة معينة، أو يكون واقف مثلا على ٩٠٪؜ فياخد درجة رأفة توصله للتسعين في المية.
= درجات الرأفة مش ياخذها طالب ناجح في مادة أو أي مادة.
= الطالب المتفوق مش بيتأثر إن فيه زميل له خد درجات رأفة وهو لأ.. لأن درجة الرأفة بتكون للطالب اللي عايز كام درجة علشان (يتحول من راسب لناجح أو من راسب لدور تاني) مش علشان مجموعه يزيد في مادة معينة.
= لما تلاقي نفسك يوم النتيجة جايب درجة النجاح بالعافية في مادة اعرف إنك غالبا الوزارة رأفت بيك واستفدت من درجات الرأفة علشان ما تبقاش راسب في المادة دي.
= هل من حق الطالب يرفض درجة الرأفة؟! أيوة من حقه.. يعني مثلا فيه طالب راسب في ٣ مواد ولازم يعيد السنة في التلات مواد، لكن الوزارة نجحته في مادة بعد ما خد فيها درجات الرأفة بحيث يدخل دور تاني في مادتين فقط.. الطالب ده من حقه يقدم طلب في الكنترول ويرفض درجات الرأفة في المادة اللي نجح فيها بحيث يعيد السنة في التلات مواد مع بعض علشان ياخذ فيهم الدرجة الفعلية مش نص الدرجة لو دخل دور تاني في مادتين فقط.
= ودي قصة درجات الرأفة اللي بتسمعوا عنها في الثانوية العامة.