= فاكرين لما كتبنا من ٣ أيام عن السؤال رقم ٣٤ في امتحان الفيزياء وقلنا إن إجابته الصحيحة (ب) واتصحح غلط على إن الإجابة هي (ج).. والسؤال ده عليه درجتين ولازم الحق يرجع لأصحابه؟. ده حصل بالفعل.
= حقكم رجع رغم صدور النتيجة ورغم بدء تنسيق القبول في الجامعات.. وكل طالب اختار الإجابة (ب) على السؤال ده، واتظلم في الدرجتين، ومجموعه في الثانوية العامة نقص درجتين.. هياخد الدرجتين بتوع السؤال ومجموعه هيزيد درجتين.
= لو عايز كلية معينة ومجموعك واقف على درجة، هتاخدها، لو كان نفسك في كلية وضاعت منك علشان درجتين هتاخدهم.. لو كان حلمك تبقى مرحلة أولى في التنسيق وبقيت مرحلة تانية بسبب درجة أو درجتين هترجع مرحلة أولى وهتدخل كلية مرحلة أولى.
= الدرجتين مش لطلاب المرحلة الأولى بس.. الدرجتين هياخدهم أي طالب اختار الإجابة (ب) للسؤال.. سواء مهما كان مجموعه ومهما كان مرحلة أولى أو تانية أو تالتة.. ولما تيجي تدخل على التنسيق هتلاقي نفسك زايد درجتين.
= الطالب اللي اختار إجابة غلط لنفس السؤال مش هيزيد.. مجموعه كما هو دون تغيير.
= المعلومات دي صحيحة بنسبة ١٠٠٪.
= مبروك لكل طالب ربنا جبر بخاطره بسبب الدرجتين دول.. وأهم رسالة في الموضوع ده: مهما حسيت إن مفيش أمل لا تفقد الأمل في ترتيب ربنا
احمد حافظ
صحفي بالاهرام
