معلومات كده علي الماشي.
مقدمه...
كميه الزيت هي ٣.٥ لترات وانك لازم يتم تغيير فلتر الزيت مع الغيار نفسه( دي وجهه نظري من واقع عملي وخبرتي للافضل ليك )
وان لا مانع لو كانت الكميه اللي في الجركن كله ( مش دي الكميه اللي تعملك ضرر ف اولسيهات الموتور او تجيبلك جوانات ) يعني لو الفني او عامل الزيت حطلك الجركن ماتتخضش..ياسيدي والمره اللي بعدها ابقي حط 3.5..وخلي بواقي الانصاص دي معاك ممكن تستخدمهم غيار ولا مانع لا ضرر وعادي...
نقيس الزيت ازاي....
كل ٣ ايام وقبل ما تطلع الصبح ب عربيتك وهيا راكنه المفروض علي وضع مستقيم..يعني ماتقيسش الزيت وهيا علي مطلع او منزل....
بيكون معاك فوطه او قماشه او مناديل حتي...
اولا بتشيل مقياس الزيت وتمسحه
وبعد كده بترجعه في مكانه تاني لاخره
وبتشيله بعد كده بنفس الوضعيه بتاعت الصوره دي.
والمفروض انه يكون بالشكل ده..
لاحظ ان في علامتين
علامه تحت وعلامه فوق المسافه اللي بينهم هي مقدار كيلو زيت
ياسيدي خليك علي ال F ...( مثال مثلا هل انت دايما بتمشي بتانك البنزين دايما علي ال F ؟ ) ((مع فارق التشبيه )) طبعا ولكن انا محتاج اوصل الصوره
ان علامه ال F يعني الكميه كلها محطوته زيت.. طيب لو نقصت ونزلت بين العلامتين ؟ اروح ارمي الموتور بقا وازعل واجيب ناس تزعل معايا انه بياكل زيت ؟ ( لا طبعا ).. لو نزل بين العلامتين ما تتخضش..ياسيدي كمل نص كيلو زيت من عندك وامشي عادي.. وماتقلقش..
الزيت للتليين والتبريد والتنظيف.. وبردو هايكون فيه نسبه بخر وتأكل عادي..وبتختلف من زيت ل زيت.. ومن حال موتور ل موتور...
انا بقولك بسط الامور علي نفسك.. الزيت ينقص شوف في تسريب واله حاجه وعالجه.. او غير نوع الزيت وارد مش مناسب ياسيدي كمل زيت..وكمل كيلوهات الغيار ان كانت 3000 او 5000 او 8000.
يبقي انا بقولك بسط الامور..وتعامل عادي جدا..
وتابع دايما مستوي الزيت ولونه مايسودش او لزوجته تبقي زي الميه... والتغيير الدوري مهم. ماتركنش الزيت فالموتور سنه مثلا حتي لو مشيك قليل.. نزله وحط غيره..
بس كده..
ويجعله عامر.........
بس كده.
