قبل الامتحان التجريبي عشر نصايح لطلاب الصف الاول الثانوي
 1- الغرض من المنظومة الجديدة كلها القضاء على رهبة الامتحان يعني متخافش الامتحان علشان تقيم نفسك مش علشان تتعقد
 2- الامتحان هيفضل على موقع الوزارة 12 ساعة يعني تقدر تمتحن في أي وقت بس خد بالك إن اللي بيخدع نفسه بيتعب فشوف مستواك الحقيقي حتى لو كان امتحانك في البيت
 3- الدروس بجد هتبقى موضة قديمة لما تشوف الامتحان هتعرف كده
 4- الموضوع بسيط بس لأنه جديد غريب عليك لكن تخيل إن الوزارة كلها مسخرة إمكانتها علشانك وكل ترتيباتها علشان تمتحتن وأنت مش حاس بالرهبة ولا شبح الامتحانات القديم واللي حفظته ودخلت واتنسى وكمية المعلومات اللي تملى كتاب... كل ده أصبح من الماضي فلما الخوف؟!
 5- الغرض من الامتحان حل المشاكل اللي ممكن تظهر وأنت بتمتحن فالخطأ وارد ومش مشكلة ولو فيه سلبيات هتصحح بعد كده.
 6- استخدام التكنولوجيا أنت أحسن فيها من الكبار بجد وممكن أنت اللي تعلم غيرك فمستهونش بقدراتك.
 7- خليك هادئ ومنظم واسمع التعليمات واعملها بدقة وبلاش تجتهد لوحدك علشان متتعطلش.
 8- دلوقت أدواتك مش قلم ومسطرة أدواتك تابلت مشحون وباقة شغالة فتأكد من ده كله قبل ما تبدأ الامتحان.
 9- أنت وزملائك فيصل بين جيل الحفظ والتلقين اللي كان ينفع في وقته وخرج علماء لأنه كان مناسب لعصره وبين جيل الفهم والابداع والعمليات العقلية المعقدة اللي تناسب الوقت والعصر فأنت وزملائك بداية تغيير كبير في طريقة التعلم فحق لك أن تفتخر بذلك.
 10- استعن بالله ولا تهمل ولا تتواكل واعتمد على نفسك بعد ربك وستجد أثر ذلك.
 وأخيرا كلنا معاك علشان يبقى الامتحان زي يوم دراسي عادي مش كابوس تعيش تحلم به طول عمرك وبكره هتحس إن الوزارة كلها بداية من المدرسة إلى الوزير بيعملوا علشانك... فعايز أيه تاني علشان تطمن.
أ/ ضياء الدين اليماني‏