النظام المطبق على أولى و تانية ابتدائي ده نظام تعليم جديد اسمه (Education 2.0)
في النظام الجديد ده المعلم لازم يشتغل في الفصل طبقا لتعليمات دليل المعلم حرفيا ، يعني مش من دماغه ، النظام ده مختلف تماما عن الطرق القديمة التقليدية ، يعني انتهى نظام التلقين بتاع زمان ،
أولا بالنسبة للواجب : في النظام الجديد ، مفيش حاجة اسمها ان المدرس يطلب من التلميذ يكتب صفحة كذا ثلاث مرات أو يحل التدريبات بتاعة الكتاب في البيت ده غلط جميع التدريبات يحلها التلميذ في المدرسة بالتعاون مع المعلم، البيت اصبح لممارسة الأنشطة و الالعاب التعليمية و الترفيه ، و ليس تعذيب الطفل بواجبات يعجز عن القيام بها و في الاخر يضطر ولي الامر هو اللي يكتب الواجب اشفاقا على ابنه ، فكل ده انتهى .
ثانيا : الاملاء : لسنة اولى و تانية ابتدائي ، عدد كلمات قليل 3 او 4 كلمات مثلا و وفيما بعد ممكن جملة صغيرة مكونة من 3 كلمات مثل : (ابي يعمل مهندسا)، وبعد الاملاء يكتب المعلم الكلمات على السبورة و التلميذ هو اللي يقيم نفسه مش المعلم ، يعني المعلم مش المفروض يلم الكراسات و يصحح الاملاء ، التلميذ هو اللي يقيم نفسه و الكلمات الخاطئة ، يكتبها عدة مرات حتى لا يخطيء فيها مجددا
ثالثا : الدروس لها خطة زمنية وفق دليل المعلم ، يعني كل أسبوع له دروس محددة ، يعني المعلم لازم يلتزم بالخطة الزمنية
رابعا : مفيش حاجة اسمها ان المدرس يكتب ع السبورة شرح قواعد نحوية او املائية و يطلب من التلاميذ نقل الشرح في كراسة ، يعني ما ينفعش يكتب شرح الضمائر و أسماء الإشارة او حروف العطف ، مثلا و يطلب من التلميذ ينقل شرح ، دي مش مرحلة سنية تسمح بكتابة شروح و قواعد و نظريات و ينقلها التلميذ و هو مش فاهم ، و الطفل مش بياخد الضمائر كلها او أسماء الإشارة كلها هو بياخد حاجتين فقط (هذا – هذه ) (انتَ – انتِ) و في سنة تانية ياخد معاهم (نحن – هم ) مثلا و يفهم من سياق الدرس و التدريبات كيف يستخدمهم و يدخلهم في جملة مفيدة ، بدون ما يحفظ قاعدة او نظرية يعني ممنوع اكتب شرح و أقول للتلميذ انقل الشرح اللي ع السبورة ، اكتساب المعلومة من خلال سياق الدرس ، و الامثلة المختلفة
خامسا : ما ينفعش المدرس بعد درس القراءة يعمل زي زمان يكتب ع السبورة الكلمة و معناها و مضادها و المفرد و الجمع و يقول للتلاميذ انقلوا الجدول اللي ع السبورة ده في الكراسة ، معاني الكلمات يستنتجها التلميذ بنفسه من سياق الجملة و النص و التدريبات ، يعني ما ينفعش أقول للتلميذ احفظ معاني الكلمات ، ده غلط ، هو يعرف ازاي يستخدمها في الحياة اليومية و يدخلها في جملة توضح معناها ، بدون ما يحفظ و هو مش فاهم .
سادسا : للأسف بعض المعلمين اللي بيشتغلوا غلط و بالطريقة القديمة ، عاملين مشاكل للمعلمين اللي بيشتغلوا صح ، لأن ولي الامر يقارن بين المعلمين و هو مش فاهم
سابعا : الامتحانات ممنوعة ، لايوجد امتحانات اسبوعية و لا شهرية و لا كل ترم و في لا في آخر السنة ،
و يجيلك ولي امر يقولك اشمعنا فلان بيعمل امتحانات ؟ ما هو ده غلط اصلا

كتبه

هالة حماد