ازيكم يا شباب
النهاردة هنكمل موضوعنا اللي بنتناقش فيه عن طرق التعامل مع المواد في النظام الجديد
النهاردة يا شباب معانا مادة الفيزياء ( 60 درجة )

الفيزياء في النظام الجديد في الثانوية العامة مختلفة بشكل كبير عن النظام القديم
في النظام القديم كان الإمتحان بييجي 80% نظري ( مصطلح وعلل وما إلى ذلك ) وبييجي 20% مسائل بينما دلوقتي الإمتحان بقى أكتر من 80% مسائل وحتى جزء النظرية بيعتمد على القوانين بشكل كبير

عشان كدا لو عايز تذاكر فيزيا صح في النظام الجديد يبقى لازم تتعامل معاها كأنها رياضة ، عارف ان معظمنا مش بيحب الرياضة بس صدقني فيزيا تالته ثانوي بالذات جمييييلة جدًا ، أسهل بكتير من أي رياضة انتا قابلتها قبل كدا...

طيب هنذاكر ازاي ؟
هنذاكر عن طريق الحل الكتير ، لأن زي ما قولنا بقت رياضة يبقى عشان نلعبها صح لازم نحل كتير...
طيب دلوقتي ايه أشكال الأسئلة اللي هتيجي في الإمتحان ؟
أول حاجه هيجيبلك أسئلة النسب ، بمعنى انه هيجيبلك قانون ويغيرلك من نسبة أحد الكميات ويطلب انك تحسب التغير في كمية تانية

يعني على سبيل المثال لما أقولك عند ثبوت المسافة اذا قل الزمن للنصف فإن السرعة ..... ، عشان تجاوب السؤال دا سيبك من كلام تغير عكسي وطردي أو نعوض ب T1 و T 2 ومعرفش ايه ، سيبك من دا كله لأنه هيتعبك عالفاضي انما انتا حلها بطريقة تانية ، الأول هتحول الكلام دا لأرقام على مزاجك ( وكدا كدا الناتج هيطلع صح ) يعني هتفرض ان السرعة كانت مثلًا 60 كيلو في الساعة والمسافة ثابتة خليها مثلًا 120 كيلومتر ، طيب بما أنك خليت السرعة 60 والمسافة 120 يبقى كدا كدا الزمن هيبقى ساعتين

طيب هو بيقولك لو الزمن قل للنصف ، يعني لو بقى ساعة وقالك ان المسافة ثابتة نفس ال120

انتا ببساطة هتقسم المسافة عالزمن يبقى عندك سرعة 120 كيلو في الساعة ، وقارنها بالسرعة الأولى هتلاقيها زادت...

الفكرة في الكلام دا انك تحط أرقام من دماغك ، انما بلاش موضوع انك تحط مجاهيل و t1 لأن دا هيشتتك وكلام ملوش لازمة أصلًا لأن أهم حاجه انك تطلع الحل صح لأن الأسئلة دي مش هتيجي غير اختياري

نيجي بقى للنوع التاني اللي هو المسائل ، انتا هتتعامل معاها كأنك بتحل مسألة رياضة عادي جدًا ، أهم حاجه تكتب كل المعطيات على جنب كدا وبعدين تشوف ايه المطلوب ،
بعد كدا تبدأ ترس كل القوانين اللي متعلقة بالمسألة وتجرب القوانين قانون قانون على المطلوبات لحد اما تلاقي قانون منهم اشتغل معاك ، وعشان كدا في حاجه لازم تعملها ، دايمًا وانتا بتذاكر خلي جنبك ورقة كدا وخططها وابقى حط فيها أي قانون يقابلك عشان متحفظش القوانين لأن الإمتحان أوبن بوك وافتكر الموضوع دا كويس جدًا

النوع التالت من الأسئلة واللي هو قليل بس موجود في النظام الجديد
أسئلة التفكير بمعنى انه هيجيبلك سؤال انتا هتظن انه ملوش أي علاقة بالمنهج بس لو ركزت هتلاقي قوانين المنهج بتنطبق عليه ، والنوع دا من الأسئلة لازم تفكر فيه بالراحة كأنك بتفكر مع نفسك مش كأنك في امتحان ، يعني زي ما جابلنا في أولى ثانوي سؤال لماذا لا يصطدم القمر بالأرض
السؤال مش موجود بالنص في المنهج بس لو فكرنا هنلاقيه في المنهج ذاكر قانون الطرد المركزي ولو فـاهـمـيـن القانون كويس هنعرف نحل السؤال بسهولة جدًا

عشان كدا لازم جنب اننا نفهم القانون للمسائل لازم بردو نعرف هو بيتكلم عن ايه بالظبط وهو جه ازاي عشان النوع التالت من الأسئلة دا واللي هو عايز طالب بيفكر تفكير مختلف عن الباقيين مش طالب داخل الإمتحان يحل مسائل وخلاص...