*نصائح هامه جدا لطلاب الثانوية قبل الإمتحانات من واقع الخبرات السابقه :
--------------------------
أولا : شوية نصايح مهمه للتعبير:
١_همزات القطع والوصل
٢_مراعاه الحالة الاعرابية للكلمات ورسم الهمزة (تجنب الكلمات اللى فيها همزات لو مش متأكد منها)
٣_منكتبش مقدمة وخاتمة محفوظة تانى بلاش المقدمات والخواتيم المحفوظة ومما لا شك فيه والكلام دة لانه بيدى انطباع وحش للمصحح
٤_نكتب ٦ فقرات منهم واحدة مقدمة والتانية خاتمة كل واحدة ٣ سطور
٥_لازم تستوفى الفكرة يعنى مثلا ميطلبش اننا نكتب عن النيل وترشيد الاستهلاك ونكتب عن النيل بس لان كدة هتنقص درجة عشان مش استوفيت الفكرة كلها
٦_علامات الترقيم لازم نراعيها ميكنش نقطة بس،لا يكون علامة استفهام مثلا فصلة علامة تعجب فصلة منقوطة وهكذا
٧_الاستشهاد لو حافظه كويس اكتبه،وحاول توضحه فى عشان يلفت انتباه المصحح بإنك تكتبه فى سطر وحده وبخط اكبر شوية من خطك فى باقى الموضوع
٨_متنزلش عن آخر سطر عشان الشكل والتنسيق،وخاصة فى التعبير الوظيفى لو طلب اختصار فى سطرين مثلا يبقى سطرين بالظبط لا تزود ولا تنقص
٩_الخط يكون حلو مش شرط فظيع بس على الاقل يتقرى ومنظم يعنى
١٠_التعبير اقصى حاجة ليه ٥٠ دقيقة وحاول تدرب على كام موضوع قبل الامتحان عشان صعب تتلافى الاخطاء فى اول موضوع تكتبه
..............................................
نصايح هامه للامتحان سواء كان عربى اوى اى مادة:
١_اول حاجة اوعى اوعى تطبق ليلة الامتحان مهما حصل،حتى لو وراك حاجة متذاكرتش،هتنام وتصحى الفجر او قبله يعنى تتسحر وتقعد تذاكر،لان لو طبقت وروحت مش نايم هيتهيألك انك مركز فى الاول لكن بعد ساعة وربع بالكتير هيحصلك حاجة اسمها "انهيار ذهنى" اللى هو تبقى قاعد مش فاهم انت بتعمل ايه جسمك فى اللجنة وعقلك فاصل خالص
٢_لازم اليومين الجايين تدرب نفسك انك تحل امتحان من ٩:١٢ عشان تبقى فى اقصى تركيزك يوم الامتحان
٣_قبل الامتحان بنص ساعة اوعى اوعى تمسك اى كتاب ولا تفتح حاجة خلاص تذاكر فيها... لان عقلك بيكون مرتب المعلومات بطريقة معينة وخلاص اكتفى من المعلومات واللى انت هتذاكره دة مش هيكون غير بعثرة للمعلومات دى
٤_في مصطلح كدة استغربته....حاجة اسمها "العزلة الشعورية" غريبة مش كدة...بس مش مشكلة معناها يعنى انك رايح الامتحان متتكلمش ايوة متتكلمش خالص...لو رايح مع زميلك او رايحة مع زميلتك لازم تكون متفقين على كدة لو مش هتقدر يبقى تروح لوحدك (انا عارف الموضوع دة صعب بالنسبة للبنات خصوصا)
بعد كدة وانت رايح ل اللجنة هتلاقى تجمعات ودة بيقول دى جاية فى الامتحان ودى المستر قالهالى اوعى تفكر تقف دة كله مفيش فايدة منه غير انه بيشتتك...دخلت اللجنة انت بردو فى عزلتك الشعورية صاحبك بيغمى عليه صاحبك بيقطع الورق بيصوت طلب قسمة ملكش دعوة دى ٣ ساعات بعد مذاكرة ١١ شهر فاستغلهم بقدر المستطاع،هتسمع واحد بيقول لصاحبه عملت الاولى ايه يقوم قايله يقوله اه تصدق صح وتلاقى واحد تالت بيأيدهم تعون بقى وكدة لو انت عامل اجابتك وواثق منها اوعى تغيرها لو جه المدرس قالك اجابتك غلط عشان بجد لو طلعت من اللجنة واكتشفت ان اجابتك هى اللى صح هتندم اوى واحساسها صعب..طلعت من اللجنة بقى وانت على بابها كدة ارمى المادة دى من دماغك واعمل خطة للمادة الجديدة...هيوقفوك عشان يراجعوا ولا كأن فى حاجة لان ببساطة لو حاجة غلط لا قدر الله هتفضل فى دماغك لاخر يوم امتحان دة غير انك معندكش اوبش انك تدخل تصلحها وتطلع يعنى
٥_مفيش حاجة معينة تبدأ بيها فى العربى دى حاجة ترجعلك...بس هو يفضل انك تبدأ بالادب عشان اول حاجة بتتنسى او اكتب مثلا الاجابة بالرصاص فى المسودة وارجع انقلها بعد كدة
٦_فككوا من الناس بتوع معايا الامتحان دول عشان انا حتى الان مش عارف ازاى فى ناس لسة بتصدق الهبل دة...محدش معاه الامتحان ولنفرض ان الامتحان اتسرب محدش غيرنا هيتأذى بردو لان الامتحان هيتعاد...دة غير ان غش وفى رمضان ككمان مش حاجة لطيفة اظن احنا بنطلب النجاح من ربنا وحرام لما تاخد مجهود حد
٧_ وآخيرا بقى ذاكر بهدوء واعمل كل شئ فى حياتك بهدوء عشان التوتر ملهوش لازمة دلوقتى
Prof.Arafa Rabiea Zaky